Cantar de Mío Cid. Folio 19r

Violos el Rey fermoso sonrrisaua
Quin los dio estos si uos vala dios mynaya
Myo çid Ruy diaz que en buen ora cinxo espada
Vençio dos Reyes de moros en aquesta batalla
Sobeiana es sennor la su ganaçia
A uos Rey ondrado enbia esta presentaia
Besa uos los pies e las manos amas
Quel ayades merçed si el criador uos vala
Dixo el Rey mucho es mannana
Omne ayrado que de sennor non ha graçia
Por acogello a cabo de tres semmanas
Mas despues que de moros fue prendo esta presentaia
Aun me plaze de myo çid que fizo tal ganançia
Sobresto todo auos quito minaya
Honores e tierras auellas condonadas
Hyd e venit daqui uos do mi graçia
Mas del çid campeador yo non uos digo nada

XLVIII

Sobre aquesto todo dezir uos quiero minaya
De todo myo Reyno los que lo quisieren far
Buennos e valientes pora myo çid huyar
Suelto les los cuerpos e quito les las heredades
Beso le las manos minaya albarfanez
Grado e graçias Rey commo a sennor natural
Esto feches agora al feredes adelant
Hyd por castiella e dexen uos andar minaya
Sin nulla dubda yd a myo çid buscar ganançia